सरकारले सरकारी कर्मचारीको पारिश्रमिक तथा सेवा–सुविधा पुनरावलोकन गर्दै शुरू स्केलमा १० प्रतिशत तलब वृद्धि गर्ने घोषणा गरेको छ ।
बिज्ञापन
संघीय संसद्अन्तर्गत प्रतिनिधिसभा र राष्ट्रियसभाको संयुक्त बैठकमा आर्थिक वर्ष २०८३/०८४ को बजेट प्रस्तुत गर्दै अर्थमन्त्री डा. स्वर्णिम वाग्लेले कर्मचारीको तलब तथा सुविधा समयानुकूल पुनरावलोकन गरिएको जानकारी दिएका हुन् । बजेट वक्तव्यअनुसार कर्मचारीलाई मासिक १० प्रतिशत प्रोत्साहन भत्ता पनि उपलब्ध गराइनेछ । तलब वृद्धि र प्रोत्साहन भत्ता जोडिएपछि कर्मचारीले हाल खाइपाइ आएको खुद आम्दानीमा करिब २१ प्रतिशतसम्म वृद्धि हुने सरकारको अपेक्षा गरिएको छ ।
बिज्ञापन
सरकारले सार्वजनिक सेवा प्रवाहलाई प्रभावकारी बनाउन, कर्मचारीको मनोबल उच्च राख्न तथा कार्यसम्पादनमा थप उत्प्रेरणा दिन यस्तो व्यवस्था गरिएको जनाएको छ । नयाँ व्यवस्थाअनुसार बहिरदारको हालको आधारभूत तलब २६ हजार ८२ रुपैयाँबाट बढेर २८ हजार ६९० रुपैयाँ पुगेको छ । मुखियाको २७ हजार ६१२ रुपैयाँ तलब वृद्धि भएर ३० हजार ३७३ रुपैयाँ कायम भएको छ । खरिदारको ३२ हजार ९०२ रुपैयाँ तलब बढेर ३६ हजार १९२ रुपैयाँ पुगेको छ भने नायब सुब्बाको ३४ हजार ७३० रुपैयाँ तलब वृद्धि भई ३८ हजार २०३ रुपैयाँ पुगेको छ ।
यस्तै अधिकृतको ४३ हजार ६८९ रुपैयाँ तलब बढेर ४८ हजार ५८ रुपैयाँ कायम भएको छ । उपसचिवको ४८ हजार ७३७ रुपैयाँ तलब वृद्धि भएर ५३ हजार ६११ रुपैयाँ पुगेको छ भने सहसचिवको ५६ हजार ७८७ रुपैयाँ तलब बढेर ६२ हजार ४६६ रुपैयाँ कायम भएको छ । सचिवको ७२ हजार ८२ रुपैयाँ तलब वृद्धि भई ७९ हजार २९० रुपैयाँ पुगेको छ भने मुख्य सचिवको तलब ७७ हजार २११ रुपैयाँबाट बढेर ८४ हजार ९३२ रुपैयाँ पुगेको छ ।
बिज्ञापन
सरकारले आगामी आर्थिक वर्षदेखि लागू हुने गरी नयाँ तलबमान कार्यान्वयन गर्ने जनाएको छ ।
